ෆින්දන්ෆුළු සහ බොන්දන්ෆුළු
එකෝමත් එක කාලෙක, එකෝමත් එක දූපතක කුරුල්ලො දෙන්නෙක් එකම දූපතේ වාසය කලා. ඒ ෆින්දන්ෆුළු සහ බොන්දන්ෆුළු. ෆින්දන්ෆුළු (ෆින්දනා) කැමති මුහුදු වෙරළ අයිනේ ජීවත් වෙන්න. බොන්දන්ෆුළු (බොන්දනා) කැමති ගොඩබිම ඇතුළෙ ජීවත් වෙන්න. ඒත් දෙන්න හොඳ යාළුවො.
දවසක් මේ දෙන්න ගෙවල් දෙකක් හදන්න තීරණය කලා. ෆින්දන්ෆුළු වෙරළේ ඉලෝෂි (ඉරටු) වලින් ගෙයක් හැදුවා. බොන්දන්ෆුළු කැලයට ගිහිල්ල තේක්ක ගහක් කපල දූපත මැද බොහොම ශක්තිමත් ගෙයක් හැදුවා.
එදා රෑ කුණාටුවක් හැමුවා. ෆින්දන්ෆුළු ගෙ ගෙදර කැඩිල ගියා. හොඳටම තෙමිලා සීතලේ ගැහි ගැහී ෆින්දන්ෆුළු බොන්දන්ෆුළු ගෙ ගෙදරට ගිහින් දොරට තට්ටු කළා. බොන්දන්ෆුළු දොර ඇරියම ෆින්දන්ෆුළු තමන්ට වෙච්ච කරදරය ගැන කියලා රෑ නිදාගන්න ඉඩක් ඉල්ලුවා. බොන්දන්ෆුළු අකැමැත්තෙන් වුනත් ෆින්දන්ෆුළු ව ගෙට අරගත්තා.
බොන්දන්ෆුළු ගෙදර මුල්ලක් පෙන්නලා ෆින්දන්ෆුළුට එතැන නිදාගන්න කිව්වා. ඒත් ෆින්දන්ෆුළු ට ඊට වඩා හොඳ තැනක් ඕනෙ වුනා. බොන්දන්ෆුළු තැන් කීපයක්ම පෙන්නුවත් මොකක් හරි අඩුපාඩුවක් කියලා ෆින්දන්ෆුළු එතැන නිදාගන්න ප්‍රතික්‍ෂේප කළා. අන්තිමේදී බොන්දන්ෆුළු කුස්සියේ බත්මුට්ටිය වහල තිබුන ලී මූඩිය පෙන්නුවා. එතැන හොඳට උණුසුමයි.
"ආහ්, මෙතැන නම් මට නිදාගන්න හොඳයි"
ඒත් ෆින්දන්ෆුළු ට බත් මුට්ටියෙන් එන සුවඳ දරාගෙන ඉන්න අමාරු වුනා. ටික වෙලාවක් යද්දි ෆින්දන්ෆුළු හෙමිහිට මූඩිය ඈත් කරල බත් චුට්ටක් අරගෙන කෑවා. හරිම රසයි. ආයෙත් ටික වෙලාවකින් ෆින්දන්ෆුළු තවත් බත් කටක් කෑවා. මූඩිය හෙලවෙන සද්දෙට බොන්දන්ෆුළු ඇහැරුනා.
"ෆින්දන්ෆුළු, ෆින්දන්ෆුළු, මොකද්ද ඒ සද්දෙ?"
"මම ඇඟේ හිරි ඇරියා"
බොන්දන්ෆුළු ආයෙත් නින්දට ගියා.
ෆින්දන්ෆුළු ආයෙත් මූඩිය ඈත් කරල බත් ටිකක් කෑවා. ආයෙත් බොන්දන්ෆුළු ඇහැරුනා.
"ෆින්දන්ෆුළු, ෆින්දන්ෆුළු, මොකද්ද ඒ සද්දෙ?"
"මට කැස්සක් ආවා"
ඔහොම ඔහොම මුළු රෑම ගෙවුනා. බොන්දන්ෆුළු ට හරි හැටි නින්දක් ලැබුනෙ නෑ. ෆින්දන්ෆුළු බත් මුට්ටියම කෑවා. උදේ ඉර එළිය වැටෙද්දිම ෆින්දන්ෆුළු කාටත් නොකියා හොරෙන්ම පිටත් වෙලා යන්න ගියා.
උදේ බොන්දන්ෆුළු ගෙ ළමයි ඇහැරිලා අම්මගෙන් බත් ඉල්ලුවා. බොන්දන්ෆුළු ගෙ බිරිඳ කුස්සියට ගිහින් බත් හැලියෙ මූඩිය ඇරල බැලුවා. බත් ඇටයක් වත් නෑ. ඒ මදිවට ෆින්දන්ෆුළු බත් මුට්ටිය ඇතුලෙ මළපහ කරල.
බොන්දන්ෆුළු කේන්තියෙන් පුපුරමින් ෆින්දන්ෆුළු හොයාගෙන ගියා.
බොන්දන්ෆුළු මුළු දූපත පුරාම හෙව්වත් ෆින්දන්ෆුළු හොයා ගන්න බැරි වුනා. ඒත් බොන්දන්ෆුළු ගෙ ළමයි මුහුදු වෙරළෙ තිබ්බ ෆින්දන්ෆුළු ගෙ අඩි පාරවල් දිගේ ගිහිල්ල ෆින්දන්ෆුළු ව හොයාගත්ත. ඌ හිටියෙ පොල් කටුවක් පිටි පස්සෙ හැංගිලා. ළමයි බොන්දන්ෆුළු ව එක්කරගෙන ආවා. ඌ ආවෙ කේන්තියෙන් වියරු වැටිල. බොන්දන්ෆුළු ෆින්දන්ෆුළුට හොඳටම ගහල අත් තටුවෙන් අල්ලල කටු අකුලකට විසි කරා.
බොන්දන්ෆුළු ගියාට පස්සෙ ෆින්දන්ෆුළු කටු අකුලෙන් එළියට ආවා. උගෙ කකුලක් කැඩිලා. ඌ අමාරුවෙන් කොර ගහමින් උදව් හොයාගෙන මුහුදු වෙරළ දිගේ ගියා. ඌ දැක්කා ධීචරයො පිරිසක් මාළු දැල් වියනවා. ෆින්දන්ෆුළු එතැනට ගිහින් ධීවරයන් ගෙන් උදව් ඉල්ලුවා. ඒත් ෆින්දන්ෆුළු ගෙ හැටි දැකපු ධීවරයො ඌව එතැනින් එළව ගත්තා.
ෆින්දන්ෆුළු වෙරළේ කවුරුවත් නැති කොනකට වෙලා ඉඳගෙන මුහුද දිහා බලාගෙන ඌට වුන ඇබැද්දිය ගැන කල්පනා කරමින් හිටියා. එහෙම ඉන්නකොට ෆින්දන්ෆුළු දැක්කා ලී පෙට්ටියක් මුහුදු රැල්ලෙ පාවෙලා එන හැටි.
ෆින්දන්ෆුළු සින්දුවක් කියන්න පටන් ගත්තා.
"රන්ෆොත්තේ ලග්ගලේ, මයින්මගා ලග්ගලේ..."
(රත්තරන් පෙට්ටිය, මාව හොයාගෙන පාවෙලා එන්න)
ලී පෙට්ටිය වෙරළට ගොඩ ගැහුවම ෆින්දන්ෆුළු පෙට්ටිය ගොඩට අරගෙන ඇවිත් ඇරල බැලුවා. ඇත්තටම ඒක රත්තරන් කුඩු වලින් පිරිලා. ඌ පෙට්ටිය රහස් තැනක හැංගුවා. දැන් ෆින්දන්ෆුළුට රත්තරන් මැනල බලන්න ඕනෙ. ඌ දන්නවා බොන්දන්ෆුළු ළඟ "ලාහි" (මැනීමට භාවිතා කරන භාජනයක්) තියෙනව කියල. ඒත් බොන්දන්ෆුළු ගෙන් ලාහි ඉල්ලන්න ගියොත් ආයෙත් ගුටි කන්නයි වෙන්නෙ.
ෆින්දන්ෆුළු බොන්දන්ෆුළු ගෙ ගෙදර ළඟ හැංගිලා බොන්දන්ෆුළු එළියට යනකං බලාගෙන හිටියා. ඊට පස්සෙ හොරෙන්ම ගෙදරට ගිහින් බොන්දන්ෆුළු ගෙ බිරිඳගෙන් ලාහිය ඉල්ලුවා. බොන්දන්ෆුළු ගෙ බිරිඳට ලොකු කුතුහලයක් ආව ෆින්දන්ෆුළු මනින්න යන්නෙ මොනවද කියල දැන ගන්න. ඇය ලාහිය දෙන්න කලින් ලාහියේ අඩියෙ දෙල් ගහේ කිරි වලින් හදන කොහොල්ලෑ ටිකක් ගෑවා.
ෆින්දන්ෆුළු ලාහියෙන් රත්තනර් මැනලා, ටිකක් වඩුරාළ ට දීලා හොඳ ගෙදරක් හදා ගත්ත. ඊට පස්සෙ ඌ ලාහිය බොන්දන්ෆුළු ගෙ බිරිඳට ගෙනත් දුන්නා. බොන්දන්ෆුළු ගෙ බිරිඳ දැක්කා ලාහිය අඩියෙ රත්තරන් කුඩු ඇලිල තියෙනවා. ඇය බොන්දන්ෆුළුට ඒ බව කිව්වා.
බොන්දන්ෆුළු ට අදහ ගන්න බෑ.
"ෆින්දන්ෆුළුට රත්තරන් ලැබුන විදිහ කොහොමහරි හොයා ගන්න ඕනෙ"
බොන්දන්ෆුළු ෆින්දන්ෆුළු ගෙ ගෙදරට ගියා. ඒක කදිම ගෙදරක්. බොන්දන්ෆුළු ගෙ ගෙදරට වඩා හොඳයි. ෆින්දන්ෆුළු බොහොම ආදරෙන් බොන්දන්ෆුළු ව පිළිගත්තා.
"කොහොමද යාළුවේ, එන්න ඇතුළට"
ආගිය කතා ඉවර වුනාම බොන්දන්ෆුළු රත්තරන් හමුවුන විදිහ ෆින්දන්ෆුළු ගෙන් ඇහුවා.
"අපෝ ඒක හරිම ලේසි වැඩක්. මුලින්ම මම තමුසෙට හොඳටම ගහල කටු අකුලකට විසි කරන්නම්. ඊට පස්සෙ තමුසෙ ගිහින් ධීවරයන් ගෙන් උදව් ඉල්ලනවා. ඒගොල්ලො තමුසෙට උදව් කරන්නෙ නෑ. ඊට පස්සෙ තමුසෙ වෙරළෙ ඈත කොනට වෙලා ඉඳගෙන ඉන්නවා. එහෙම ඉද්දි පෙට්ටියක් මුහුදෙ පාවෙලා එයි. තමුසෙ එතකොට සින්දුවක් කියන්න ඕනෙ."
"මොන සින්දුවක් ද?"
"රන්ෆොත්තේ ලග්ගලේ, මයින්මගා ලග්ගලේ...."
"හරි මම ලෑස්තියි"
ෆින්දන්ලුළු බොන්දන්ලුළු ට හොඳටම ගහල කටු අකුලකට විසි කලා.
ඒ අතරෙ බොන්දන්ලුළු ගෙ බිරිඳ ඔහුව හොයාගෙන බොන්දන්ලුළු ගෙ ගෙදර ආවා.
"අපේ මනුස්සය දැක්කද? කොහෙ ගිහින් ද මන්දා. ළමයි කන දෙයක් ඉල්ලලා අඬනවා."
ෆින්දන්ෆුළු ඌ ළඟ තිබ්බ කෑම ටිකක් බොන්දන්ෆුළු ගෙ බිරිඳට දුන්නා.
ගොඩක් වෙලාවකට පස්සෙ බොන්දන්ෆුළු අමාරුවෙන් කටු අකුලෙන් එළියට ආවා. ඌ වෙරළ දිගේ ධීවරයො ඉන්න තැනට ගියා. ධීවරයො ඌව එලව ගත්තා. ඊට පස්සෙ බොන්දන්ෆුළු වෙරළේ ඈත කෙළවරට ගිහින් මුහුදු වෙරළේ ඉඳගත්තා.
බොන්දන්ෆුළු දැක්කා ලී පෙට්ටියක් රැල්ලේ පාවෙන හැටි. බොන්දන්ෆුළු ගෙ හදවත ප්‍රීතියෙන් ගැහෙන්න ගත්තා. ඌ සින්දුව කියන්න පටන් ගත්තා.
"රන්ෆොත්තේ ලග්ගලේ, මයින්මගා ලග්ගලේ......"
පෙට්ටිය වෙරළට ආවා. බොන්දන්ෆුළු පෙට්ටිය ඇරල බැලුවා.
ඒත් පෙට්ටිය ඇතුලෙ රත්තරන් කුඩු තිබුනෙ නෑ. ඒක පිරෙන්න හිටියෙ දෙබරු. උන් බොන්දන්ෆුළුට හොඳටම දෂ්ඨ කලා. පන්න පන්න දෂ්ඨ කලා. බොන්දන්ෆුළු මුහුදු වෙරළේ වැටිලා එතැනම මිය ගියා.
දෙවැනි දවසෙත් බොන්දන්ෆුළු ගෙ බිරිඳ ෆින්දන්ෆුළු හොයාගෙන ආවා.
"මගේ ළමයින්ට බඩගිනියි"
ෆින්දන්ෆුළු ඇයට කෑම ටිකක් දීලා පිටත් කරල ඇරියා.
තුන්වෙනි දවසේ ෆින්දන්ෆුළු බොන්දන්ෆුළු ගෙ ගෙදරට ගිහින් බොන්දන්ෆුළු ගෙ බිරිඳයි ළමයි ටිකයි ඔහුගෙ ගෙදරට කැන්දගෙන ආවා.
එදා ඉඳල හැමෝම සතුටින් ජීවත් වුනා෴
- කතාව කිව්වේ මයිමුනා (මාලේ දූපත)
මේ කතාවේ සැඟවුනු උපහාසයක් තියෙනවා. ගොඩබිම ඉන්න බොන්දන්ෆුළු වෙරළේ ඉන්න ෆින්දන්ෆුළු අතින් උපහාසයට ලක් කිරීම මගින් දිවෙහි රාජ්ජේ වැසියෝ මුහුදත් එක්ක ජීවත් වෙන එක උසස් ජීවන රටාවක් කියල සැලකුව බවත්, ගොඩබිම එක්ක ජීවත් වෙන එක හාස්‍යයට ලක් කළ බවත් තමයි පේන්නෙ. ධීවර කර්මාන්තය වගේ "මුහුදු" රැකියා පොල් වගාව වගේ "ගොඩබිම්" රැකියා වලට වඩා වීරත්වයෙන් පිරුණු උසස් ජීවන රටාවක් කියල තමයි දිවෙහි රාජ්ජේ වැසියෝ සැලකුවේ.
අටුවාව
1. ෆින්දනා
ඉංග්‍රීසියෙන් "Common Sandpiper" කියලත්, සිංහලෙන් "සිලිබිල්ලා" කියලත් හැඳින්වෙන කුරුල්ලා දිවෙහි බසින් හැඳින්වෙන්නේ "ෆින්දනා" කියල. මේ කුරුල්ලා දිවෙහි රාජ්ජේ සුලබ කුරුල්ලෙක්. ඒ නිසාමදෝ දිවෙහි රාජ්ජේ ජනකතා වල නිතර හමුවෙන චරිතයක්. මුහුදු වෙරළේ ඇවිදිමින් වැලි අස්සෙ හැංගිල ඉන්න කුඩා කුරුමිණි සත්තු අල්ලගෙන කන්න ෆින්දනා රුසියෙක්.
2. බොන්දනා
සිංහලෙන් "වැලි ඔලෙවියා" කියලත් ඉංග්‍රීසියෙන් "Greater Sandplover" කියලත් හැඳින්වෙන කුරුල්ලා දිවෙහි බසින් හැඳින්වෙන්නෙ බොන්දනා කියලා. ෆින්දනා වගේම බොන්දනත් ජීවත් වෙන්නෙ වැලි අස්සෙ හැංගිලා ඉන්න කුඩා කුරුමිනි සත්තු අල්ලගෙන කාලා.
+++++
ReplyDeleteනියමයි මචං...
ReplyDelete