Sunday, September 30, 2018

ජපන්නු කන හැටි - නූඩ්ල්ස්


නූඩ්ල්ස් කියන්නෙ ජපානයේ වැඩිපුරම ආහාරයට ගැනෙන කෑම​.

ජපානයේ නූඩ්ල්ස් කන්නෙ බොහෝ විට නූඩ්ල්ස් සුප් විදිහට​. ඒ වගේම ජපානයේ නූඩ්ල්ස් කන ක්‍රම දෙකක් තියෙනවා. ඒ උණුසුම්වට සහ සීතලට​.

නූඩ්ල්ස් මුලින්ම බිහි වෙන්නෙ චීනයේ. ඒ පළවෙනි සියවසේදී. බෞද්ධ භික්‍ෂුවක් විසින් චීනයේ ඉඳල ජපානයට මුලින්ම නූඩ්ල්ස් ගේන්නෙ 9 වෙනි සියවසේ දී.

මුල්ම නූඩ්ල්ස් හැදුවේ තිරිඟු පිටි යොදාගෙන​. පසුව වෙනත් අමුද්‍රව්‍යය වලින් හදන නූඩ්ල්ස් ක්‍රමයෙන් ජනප්‍රිය වුනා.


නූඩ්ල්ස් වර්ග​


ජපානයේ සියළුම නූඩ්ල්ස් වර්ග ප්‍රධාන වර්ග හතකට බෙදන්න පුළුවන්.

1. උදොන්




උදොන් හදන්නේ තිරිඟුපිටි වලින්. උදොන් නූඩ්ල්ස් රැළි සුදු පාටයි සහ ගොඩක් මහතයි. මේ නිසා හොඳට හැපෙන මෘදු සොබාවය උදොන් වල සලකුණක්.

උදොන් තමයි ජපානයට මුලින්ම ආපු නූඩ්ල්ස් වර්ගය​.


2. රාමෙන්




රාමෙන් තමයි ජපානයේ ජනප්‍රියම නූඩ්ල්ස් වර්ගය​. රාමෙන් හදන්නෙ තිරිඟුපිටි, ලුණු, වතුර සහ කන්සුයි කියල හැඳින්වෙන ලවණ මිශ්‍ර දියරයක් උපයෝගී කරගෙන​. රාමෙන් වලට ආවේනික රස ලැබෙන්නෙ කන්සුයි වලින්.

රාමෙන් නූඩ්ල්ස් උදොන් වලට වඩා මහතින් අඩුයි. ඒ වගේම ලා කහ පාටයි. මෘදු සොබාවයෙන් යුක්තයි.

රාමෙන් නූඩ්ල්ස් ජපානයට එන්නෙ චීනයේ ඉඳල 1900 දී පමණ​.


3. සොබා




සොබා නූඩ්ල්ස් හදන්නෙ බක්වීට් ධාන්‍යයෙන්. සොබා නූඩ්ල්ස් රැලි උදොන් වලට වඩා මහතින් අඩුයි. පැහැයෙන් දුඹුරු පාට සොබා නූඩ්ල්ස් තරමක් කටුක රසින් සහ රළු සොබාවයෙන් යුක්තයි. නමුත් පෝෂ්‍ය ගුණයෙන් ඉතා ඉහළයි.

ගොඩක් නූඩ්ල්ස් වර්ග චීනයේ ඉඳල ජපානයට ආවත්, සොබා නූඩ්ල්ස් වල උපත ජපානය මයි.

4. සෝමෙන්




තිරිඟු පිටි වලින් හදන සෝමෙන් නූඩ්ල්ස් ඉතාම සිහින්. පැහැයෙන් සුදු පාට සෝමෙන්, සොබාවයෙන් මෘදුයි. සෝමෙන් නූඩ්ල්ස් සෑදීමේදී රැළි සිහින් කිරීම පහසු කරවන්න එළවළු තෙල් එකතු කරනවා.


5. හියාමුගි




හියාමුගි හදන්නෙ බක්වීට් වලින්. රැළි උදොන් වලට වඩා සිහින්, නමුත් සෝමෙන් වලට වඩා මහතයි. පැහැයෙන් සුදු හෝ ලා දුඹුරු පාටයි. හියාමුගි එතරම් ජනප්‍රිය නූඩ්ල්ස් වර්ගයක් නෙවෙයි.


6. ෂිරතකි




කොන්ජැක් අල වලින් හදන ෂිරතකි නූඩ්ල්ස් තරමක් විනිවිද පෙනෙන සුළු සුදු පැහැයෙන් යුක්ත සිහින් නූඩ්ල්ස් වර්ගයක්. ඒවා සොබාවයෙන් ජෙලටින් වගේ. තරමක් තද ගතියෙන් යුක්ත මේ නූඩ්ල්ස් සෞඛ්‍ය සම්පන්න ආහාරයක් විදිහට සැලකෙනවා.


7. හරුසමෙ




අල​, බතල​, බෝංචි ඇට​, මඤ්ඤොක්කා වැනි ආහාර වල පිෂ්ඨ ධාතුවෙන් නිපදවන හරුසමෙ නූඩ්ල්ස් සිහින්, ඒ වගේම විනිවිද පෙනෙන සුළුයි. මේ විනිවිද පෙනෙන සුළු සොබාවය නිසාම ඒවා "සෙලෝපේන් නූඩ්ල්ස්" කියලත් හැඳින්වෙනවා.


නූඩ්ල්ස් පිළියෙල කරන ක්‍රම​


නූඩ්ල්ස් පිළියෙල කරන ක්‍රම සිය ගාණක් තියෙනවා. මේ එයින් ජනප්‍රිය ක්‍රම කීපයක්. බොහෝ විට මේ ක්‍රම එකිනෙකෙන් වෙනස් වෙන්නෙ නූඩ්ල්ස් සුප් එකට එකතු කරන දේ අනුව​. සුප් විදිහට පිළියෙල නොකරන ක්‍රමත් තියෙනවා.

1. උදොන් පිළියෙල කරන ක්‍රම​


නූඩ්ල්ස් සුප් වර්ග 


උදොන් නූඩ්ල්ස් සුප් හදද්දි සිහින්ව කපා ගත් ළූණු කොළ අනිවාර්‍ය අංගයක්.  ඊට අමතරව එළවළු වර්ගත් එකතු කරනවා. එකතු කරන විශේෂ දෙයක් අනුව තමයි නූඩ්ල්ස් වර්ගය නම් කෙරෙන්නෙ.

කකෙ උදොන් : නූඩ්ල්ස් සහ ළූණු කොළ පමණයි
තනුකි උදොන් : බදින ලද පිටි කැබලි
කිත්සුනෙ උදොන් : සිහින්ව කැපූ බදින ලද ටෝෆු


ත්සුකිමි උදොන් : අමු බිත්තරයක්
තෙම්පුරා උදොන් : පිටි වලින් වහල බැදපු ඉස්සන්
කරේ උදොන් : මස් සහ එළවළු සමඟ ජපන් කරි


චිකර උදොන් : මෝචි හෙවත් බත් කේක්
නබෙයකි උදොන් : බිම්මල්, බිත්තර සහ තවත් දේ සමඟ තාච්චියක පිළියෙල කරන උදොන් වර්ගයක්.
වකමෙ උදොන් : වකමෙ නමින් හැඳින්වෙන මුහුදු පැළෑටි




සුප් නොවන ආකාර


සරු උදොන් :
ශීත කළ උදොන් කුඩා නොරි කැබැලි සමඟ​. පිළිගන්වන්නේ උණ පතුරු වලින් හදපු තැටියක තියලා. කන්න කලින් සෝස් වල ඔබා ගත යුතුයි.

කමාගෙ උදොන් :
උණුවතුරේ ගිල්වූ උදොන් නූඩ්ල්ස්. පිළිගන්වන්නේ විශාල ලී බඳුනක​.


2. රාමෙන් පිළියෙල කරන ක්‍රම​


රාමෙන් පිළියෙල කරන්නෙ සුප් විදිහට විතරයි. ඒ වගේම රාමෙන් හැම විටම කන්නෙ උණුවෙන්.

ෂෝයු (සෝයි) රාමෙන්:
ෂෝයු සෝස් සහ කුකුළු මස්. ඊට අමතරව ඌරු මස්, හරක් මස්, මාළු, බිත්තර සහ එළවළු වර්ග තියෙන්න පුළුවන්. වඩාත්ම ජනප්‍රිය රාමෙන් වර්ගය ෂෝයු රාමෙන්.

ෂියෝ (ලුණු) රාමෙන්:
ලුණු සහ කුකුළු මස්. ඊට අමතරව බිත්තර, ඌරු මස් සහ හරක් මස් තියෙන්නත් පුළුවන්.


මිසෝ (සෝයි ඇට​) රාමෙන්:
සෝයි බෝංචි ඇට වලින් හදන මිසෝ සුප්. ඊට අමතරව බඩ ඉරිඟු ඇට​, ඌරු මස්, බිත්තර සහ එළවළු වර්ග තියෙන්න පුළුවන්. උතුරු ජපානයේ බිහිවුන නූඩ්ල්ස් පිළියෙල කිරීමේ ක්‍රමයක්.

තොන්කොත්සු (ඌරු කටු) රාමෙන්:
උණු වතුරෙ දාල මස් දියවෙන තුරු තම්බපු ඌරු කටු. මේකට ඌරු මේද කැබැලි සහ කුකුළු මසුත් එකතු කරනවා. තොන්කොත්සු රාමෙන් සුප් ඉතාම උකු ගතියෙන් යුක්තයි. දකුණු ජපානයේ බිහිවුන නූඩ්ල්ස් පිළියෙල කිරීමේ ක්‍රමයක්.


3. සොබා පිළියෙල කරන ක්‍රම​


නූඩ්ල්ස් සුප් වර්ග


කකෙ සොබා : සිහින්ව කැපූ ළූණු කොළ. සමහර විට මාළු.
තනුකි සොබා : බදින ලද පිටි කැබලි
කිත්සුනෙ සොබා : සිහින්ව කැපූ බදින ලද ටෝෆු


ත්සුකිමි සොබා : අමු බිත්තරයක්
තෙම්පුරා සොබා : පිටි වලින් වහල බැදපු ඉස්සන්
කරෙනංබන් : මස් සහ එළවළු සමඟ ජපන් කරි


වකමෙ සොබා : වකමෙ නමින් හැඳින්වෙන මුහුදු පැළෑටි
සන්සයි සොබා: කැලෑ එළවළු සහ උණ දළු
නංබන් සොබා: ලීක්ස් සහ කුකුළු මස් හෝ තාරා මස්

නමෙකො සොබා: නමෙකො බිම්මල්
නිෂින් සොබා: හෙරිං මාළු



සුප් නොවන ආකාර​


සරු සොබා :
ශීත කළ උදොන් කුඩා නොරි කැබැලි සමඟ​. පිළිගන්වන්නේ උණ පතුරු වලින් හදපු තැටියක තියලා. කන්න කලින් සෝස් වල ඔබා ගත යුතුයි.

මොරි සොබා:
සරු සොබා වලට සමානයි, නමුත් නොරි කැබලි නෑ.

තොරොරො සොබා:
ශීත කළ සොබා සමඟ සිහින්ව ලියා ගත් අල වලින් තැනූ උකු ක්‍රීම්. මේ ක්‍රීම් නූඩ්ල්ස් මත වත් කරල වගේම වෙනම කෝප්පයකත් පිළිගන්වන්න පුළුවන්.




නූඩ්ල්ස් කන විදිහ​



අනෙක් හැම කෑමකටම වගේ නූඩ්ල්ස් වලටත් කන්න ඕනෙ විදිහක් තියෙනවා.

නූඩ්ල්ස් අනිවාර්‍යයෙන්ම කන්න ඕනෙ කෝටු දෙකෙන්. කිසිම වෙලාවක අතින් කන්න බෑ.

කෑමට පෙර සෝස් වල ඔබාගත යුතු නූඩ්ල්ස් වර්ගයක් නම්, නූඩ්ල්ස් රැළි කීපයක් කෝටු දෙකේ ඔතාගෙන සෝස් දීසියේ මද වශයෙන් ඔබාගෙන කන්න ඕනෙ. වසාබි අවශ්‍යය නම් සෝස් දීසියට කලවම් කරගන්න ඕනෙ.

නූඩ්ල්ස් සුප් එකක් නම්, නූඩ්ල්ස් රැළි කීපයක් කෝටු දෙකෙන් අරගෙන කටට දාගන්න ඕනෙ, ඒවායේ අනෙක් කෙලවර සුප් එක තුලම තියෙද්දි. ඊට පස්සෙ කෝටු දෙකෙන් නූඩ්ල්ස් එහෙ මෙහෙ යන්න නොදී මෙහෙයවන ගමන් කටට උරන්න ඕනෙ. මෙහෙම උරද්දි ශබ්දය පිට වෙනව නම් ඉතාමත් හොඳයි. ඒකෙන් ඔබ නූඩ්ල්ස් රස විඳින බව අනෙක් අයට​, විශේෂයෙන්ම කෝකියාට​, ඇඟවෙනවා. නූඩ්ල්ස් මේ විදිහට උරල කන එකෙන් නූඩ්ල්ස් නිවෙනවා වගේම රස වඩා හොඳින් දැනෙනවා.

බොහෝ විට නූඩ්ල්ස් සුප් කෝප්පය එක්ක පොඩි හැන්දකුත් දෙනවා. ඒ කෝටු දෙකෙන් ගන්න අමාරු පොඩි එළවළු කෑලි කන්න​.

නූඩ්ල්ස් කාල ඉවරවෙලා කෝප්පයේ ඉතුරු වෙන සුප් කෝප්පයෙන්ම බොන්න ඕනෙ. සුප් සියල්ලම බොන්න අවශ්‍යය නෑ. නමුත් එහෙම කිරීම කෝකියාට කරන ප්‍රසංශාවක් විදිහටයි සලකන්නේ.


1 comment:

  1. පෙනුම නම් ලස්සනයි. රස කොහොම වෙයිද කියලා සැකයි.

    ReplyDelete