Tuesday, December 19, 2017

දිවෙහි රාජ්ජේ ජනකතා - 8 (හෙරා)

(උපුටා ගැනීම ක්සේවියර් රොමේරෝ ෆ්‍රියාස් ගේ "Folk Tales of the Maldives" පොතෙන්)

සරල විනෝදාත්මක කතාවක් වගේ පෙනුනත්, ඉතා ගැඹුරු අදහසක් තියෙන කතාවක්.

හෙරා


බොහොම කාලෙකට ඉස්සර මාලේ දූපතේ හිටියා "හෙරා" කියලා මනුස්සයෙක්. ඔහු කළු විසාල ශරීරයක් තියෙන මනුස්සයෙක්. ඒ වගේම "කොලොප්පම් කාරයෙක්" විදිහට නම් දරාපු අයෙක්.

දවසක් හෙරා මාලේ වරාය අසල ඉන්නකොට ඈත අතොළුවකින් ආපු බෝට්ටුවක් වරායට සේන්දු වුනා. හෙරා දන්නවා ඔවුන් නවාතැන්පොළක් හොයන බව​. ඔහු ඒ පැත්තට කිට්ටු කරා.

"ඔහෙලට අද නවතින්න තැනක් තියෙනවද​?"

"නෑ. ඔහේ දන්නවද හොඳ තැනක්?"

"මට පුළුවන් හොඳ ගෙයක් ඔහෙලට ලාබෙට හොයල දෙන්න​"

"කීයද ගාන​"

"ලාරි දෙකයි"

ලාරි දෙකක් කියන්නෙ ඉතාම සුළු මුදලක්. මේ හදිසියේ කඩාපාත් වුන නොසිතූ ලාබයෙන් උද්දාමයට පත් වුන මිනිස්සු  වැඩේට කැමති වුනා.

හෙරා ඔවුන් ව එක්කරගෙන ගියා මාලේ නගරයේ තිබ්බ ප්‍රසිද්ධ පල්ලියක් වුන "එතෙරෙකෝලු මිස්කි" යට​. ඔවුන්ට පල්ලිය පෙන්නපු හෙරා ලාරි දෙකක ගාස්තුවත් අරගෙන එතැනින් අතුරුදහන් වුනා.

ලාරි දෙකක් වගේ සුළු මුදලකට ඒ වගේ ඉස්තරම් නවාතැනක් හමුවීම ගැන උද්දාමයට පත් මිනිස්සු තමාගේ බඩු බාහිරාදිය අඩුක් කරගෙන බුලත් විටක් කමින් මහන්සි අරින්න පටන් ගත්තා.

මද්දහන වෙනකොට "මුදීමු" (පල්ලිය බලාගන්න නිලධාරියා) දහවල් "සුහුර්" යාඥාව සඳහා පල්ලිය අස් කරන්න ආවා. මිනිස්සු ටිකක් පල්ලියේ ඉන්නව දැකපු ඔහු බොහොම කෝප වෙලා ඔවුන්ව එතැනින් එලව ගත්තා.

මිනිස්සු හෙරා ඔවුන්ට කරපු වංචාව ගැන රදුන් ට පැමිණිලි කරා. රදුන් හෙරාව අත් අඩංගුවට ගන්න හේවා පන්නයක් පිටත් කරල ඇරියා. ඔවුන් හෙරා ව අල්ල ගත්තා.

"හෙරා මේ පාර නං උඹ අමාරුවෙ වැටුනා. අන්න මිනිස්සු වගයක් උඹ උන්ට වංචාවෙන් පල්ලියක් කුලියට දුන්න කියල රදුන් ට පැමිණිලි කරලා"

ඔවුන් හෙරා ට කිව්වා.

"නෑ. මම උන්ට වංචා කරේ නෑ. උන් තමයි මට වංචා කරන්න හැදුවෙ"

"මොන මගුලක් ද උඹ කියන්නෙ"

"මොළයක් තියෙන ඕන එකෙක් දන්නවා ලාරි දෙකකට ගෙයක් කුලියට ගන්න බැරි බව​. මුළු මාලදිවයිනේ ම ඉන්න හැම මනුස්සයම ඒ බව දන්නවා. ඉතින් ඒ බව දැන දැනත් උන් මට ලාරි දෙකක් දීලා ගෙදරක් කුලියට ගන්න හැදුව නෙ. ඒක වංචාවක් නෙවෙයි ද?"

හේවායෝ ටික තක්කු මුක්කු වෙද්දි හෙරා හෙමීට එතැනින් මාරු වුනා෴


- කතාව කිව්වේ ගා ගේ නයිමා (මාලේ දූපත​)

අටුවාව

1. ලාරි
දිවෙහි බසින් "ලාරි" කියන්නෙ "කාසි" නැත්තම් මුදල් කියන අර්ථය​. පැරණි මාලදිවයිනේ භාවිතා වුන මුදල් ඒකකය ලාරි. වර්තමාන මාලදිවයිනේ රුෆියා සහ ලාරි භාවිතා වෙනවා (ලාරි 100 = රුෆියා 1). පර්සියානු කාසියක් වන "ලැරින්" ඇසුරෙන් තමයි "ලාරි" හැදිල තියෙන්නෙ.


වර්තමාන ලාරි දෙකේ කාසියක්

1 comment: