වීදුරු පළිඟු
මුළු මහත් දඹදිවම පසිඳු
මාහැඟි පළිඟු බඳුනකි
එහි හිමිකරු වීම
ඉල්ලීස සිටු වරයා ගේ
එකම අරමුණ විය.
පළිඟු බඳුන හිමිකර ගැනීමට
සූ සැටක් ප්‍රයෝග ද
අසූ කෙළක් ධනය ද
යෙදීමට
ඔහුගේ මුළු දිවියම කැපවිය.
ධනය වැය වේ යැයි ලොබින්
නිසි අහරක් නොලද
ඔහුගේ ගත
ඉරටු කූරු මෙන්
සිහින් විය.
පළිඟු බඳුන ගැනම සිතා
නිදි වැරීමෙන්
ඔහුගේ දෙනෙත්
විළිකුන් ඵල මෙන්
රත් පැහැ විය.
දොළොස් වසක ඇවෑමෙන්
ඉල්ලීස සිටු තෙමේ
පළිඟු බඳුන හිමි කර ගත් දින
ඉල්ලීස සිටු මැදුරේ
මහත් සාදයක් විය.
දොළොස් වසක් පුරා
සිටු මැදුරට ආගන්තුක වූ
නෙක රස මසවුළු ද
නෙක සුරා පානයන් ද
නොමසුරුව පිළියෙල කෙරිනි.
මැදුම් යාමය නිමාවත්ම
අමුත්තන් නික්ම ගිය පසු
ඉල්ලීස සිටු තෙමේ
පළිඟු බඳුන දෑතින් ගෙන
සිත් සේ විඳින්නට විය.
සුරාවෙන් මත් වූ
ඔහුගේ දෑත
ඔහුට අකීකරු වූයෙන්
මද ප්‍රමාදයක් බැලූ
පළිඟු බඳුන
ඔහු අතින් බිමට පැන
මියුරු සංගීතය රාවයක් මවමින්
කැබලි සියයක් ව
කාමරය පුරා
විසිරී ගියේය.
වීදුරු කැබලි දෙස
දෙනෙත් දල්වා බලා උන්
ඉල්ලීස සිටු තෙමේ
මද සිනා පා
සයනය වෙත ගොස්
දොළොස් වසකට පසු
සිත් සේ නිදා ගත්තේය.
No comments:
Post a Comment