Friday, March 2, 2018

දිවෙහි රාජ්ජේ ජනකතා - 28 (මෙකුනු සහ ගාහක​)

(උපුටා ගැනීම ක්සේවියර් රොමේරෝ ෆ්‍රියාස් ගේ "Folk Tales of the Maldives" පොතෙන්)

මෙකුනු සහ ගාහක​ (ගොඩයා සහ බෙල්ලා)


එදා හරිම ලස්සන උදෑසනක්. මද සුළඟක් මුහුද මතින් හමා යමින් තිබ්බා. ලා නිල් පාට නොගැඹුරු පැහැදිලි මුහුදේ නිසල ජල තලය මත ඒ මද සුළඟ නිසා රැළිති ඇති වුනා.

කලපුවේ නොගැඹුරු දියේ "මෙකුනු" (ගොඩයෙක් - වේගයෙන් පීනන මාළුවෙක්) පීනමින් උන්නා. ගොඩයා වේගයෙන් පීනනකොට උගේ රිදී පාට කොරල උඩට වැටුනු ඉර එළිය දිලිසුනා. මෙකුනු ප්‍රීතියෙන් වතුරෙන් උඩට පනිමින් කරනම් ගැහුවා.

මුහුදු පතුලේ "ගාහක​" (යෝධ බෙල්ලෙක්) ඉහළ ජල තලයේ කරණම් ගහන මෙකුනු දිහා බලාගෙන සුසුම් හෙළුවා.

"මම වගේ අවාසනාවන්තයෙක්! මගේ ජීවිතේ කොයිතරම් අමාරු ද​? මම හැමදාම මෙතැනට වෙලා මගේ මුළු ජීවිතේම ගෙවනවා. ඒත් මෙකුනු නිදහසේ ඌට හිතෙන තැන පීනනවා. මම මේ කොරල් පරයේ හිරකාරයෙක්!"

යම්කිසි දෙයක් ලබා ගන්න එක් අයෙකුට පුළුවන් වෙලා තව අයෙකුට බැරි වුනොත් දිවෙහි රාජ්ජේ වැසියෝ ඒකට කියන්නෙ "මෙකුනු ෆුමුනකස් ගාහකයක නුෆුමුවේනෙ" (ගොඩයා පිනුම් ගැහුවට බෙල්ලට පිනුම් ගහන්න බෑ) කියල​.


- කතාව කිව්වේ අලී නජීබු (මාලේ දූපත​)

අටුවාව

1. මෙකුනු

ඉංග්‍රීසියෙන් mullet සහ සිංහලෙන් ගොඩයා කියල හැඳින්වෙන මාළුවා දිවෙහි බසින් හැඳින්වෙන්නෙ මෙකුනු කියලා. නොගැඹුරු මුහුදේ ඉන්න මෙකුනු වේගයෙන් පීනන්න පුළුවන් මීටර් බාගයක් විතර දිග කිලෝ ග්‍රෑම් 20 ක් විතර බර මධ්‍යම ප්‍රමානයේ මාළුවෙක්.



2. ගාහක​

ඉංග්‍රීසියෙන් කියල හැඳින්වෙන යෝධ බෙල්ලා දිවෙහි බසින් හැඳින්වෙන්නේ ගාහක කියලා. ගාහක කොරල් පරයේ එක තැනකට ඇලිලා මුළු ජීවිතයම ගෙවනවා. හොඳින් වැඩුනු ගාහකයෙක් මීටරයකට වඩා දිග වෙන අතර​, කිලෝ ග්‍රෑම් 200 ක් විතර බරයි.



No comments:

Post a Comment