බුද්ධාගම සහ බෞද්ධ දර්ශනය ගැන මට හිතෙන දේ මෙහෙමයි.
බෞද්ධ දර්ශනය කියනවට වඩා මම කැමති වචනෙ බෞද්ධ ධර්මය කියන එක. බෞද්ධ ධර්මය කියන්නෙ බුදු හාමුදුරුවෝ දේශනා කරපු අදහස් වල අරටුව. ඒ කියන්නෙ චතුරාර්‍ය සත්‍යය, ආර්‍ය අෂ්ඨාංගික මාර්ගය වගේ ඒවා. ඒවා තියෙන්නෙ නිවන් දැකීම අරමුණු කරගෙන.
බුද්ධාගම කියන්නෙ බෞද්ධ ධර්මය කියන අරටුව වටා ගොඩ නැංවුනු ගහක්. ඒක අරමුණු කරගෙන තියෙන්නෙ නිවන් දැකීම සඳහා අවශ්‍ය මානසික තත්වයන් මිනිස්සු තුල ගොඩ නැංවීම. පන්සිල්, දානමය පිංකම්, බෝධිපූජා, චෛත්‍ය වන්දනා වගේ ඒවා අයිති වෙන්නේ මේකට. ඒවායින් බලාපොරොත්තු වෙන්නෙ මිනිස්සුන් ගෙ සිත සන්සුන් කිරීම, ශීලය, හික්මීම ඇතිකිරීම, ඇලීම අඩු කිරීම, සමාජය සාමකාමී කිරීම වගේ දේවල්. ඒවා කරාම නිවන් දකින්නෙ නෑ. නමුත් නිවන් අවබෝධයට සුදුසු පරිසරයක් සකස් කරනවා.
එතකොට මේ ගහ හිටවල තියෙන්නෙ බෞද්ධ සංස්කෘතිය නැමැති උයනේ. ලංකාවෙ නම් මේ උයනට කියන්නෙ සිංහල බෞද්ධ සංස්කෘතිය කියල. ඒ කියන්නෙ බෞද්ධ ධර්මය සහ බුද්ධාගම පාදක කරගනිමින් ගොඩනැංවුනු ජීවන ක්‍රමයක්. හැබැයි මේකට වෙනත් සංස්කෘතීන් ගෙන් අවශෝෂනය වෙච්ච දේවල් අනන්ත තියෙනවා. මේ උයනේ වෙන ගස් ගොඩක් තියෙනවා. සමහර ගස් මේ ගහටයි ඒකෙ අරටුවටයි පිළිලයක් වෙන වෙලාවලුත් තියෙනවා. නමුත් පොදුවේ ගත්තම ගහ සහ අරටුව රැකෙන්නෙ උයන නිසා.
No comments:
Post a Comment